Машката ракометна репрезентација на Македонија влегува во квалификациите за Европското првенство во 2020 година со нов спонзор. Лого на Халкбанк за првпат ќе биде присутен на националниот дрес и тоа почнувајќи од утрешниот дуел против Турција во Битола. Заштитниот знак на банката ќе се користи и на дресовите сениорската женска селекција и националните тимови во млади категории во машка и женска конкуренција (младинска, кадетска и пионерска).
Договорот за партнерство до крајот на 2019 година го потпишаа првиот човек на Ракометната федерација на Македонија (РФМ) и генералниот директор на Халкбанк, Билал Суџубаши.
„Ние како банка отсекогаш сме го препознавале и наградувале успехот што се темели на посветеност, на натпреварувачки дух и на тимска работа. Сметаме дека е исклучително важно да изразиме поддршка и кон македонскиот ракомет како, можеби, најклучна гранка на националниот спорт и заедно со македонските граѓани и верните навивачи да дадеме дополнителен мотив на ракометарите да продолжат со победи“, изјави Билал Суџубаши.
„Навистина ме радува фактот што Халкбанк искрено ги препознава вистинските вредности во сите сегменти на нашето живеење, а секако не исклучувајќи го тука и македонскиот ракомет. Благодарност за оваа поддршка што многу ни значи бидејќи токму ваквите партнерства ни даваат шанса да покажеме пред светот дека навистина имаме квалитетен ракомет и вистински велемајстори“, изјави претседателот на РФМ, Живко Мукаетов.