Заврши јавната седница на која јавната обвинителка Ленче Ристовска ги образложи причините зошто СЈО и понатаму бара замрзнување на имотот на ВМРО ДПМНЕ во рамки на истрагата „Талир“.
Ристовска истакна дека решението на кривичниот совет од Основен 1 со кое е одбиено нивното барање за замрзнување на имотот на ВМРО ДПМНЕ е незаконско.
Еден од клучните аргументи кои ги изложиле пред судиите е дека веќе еднаш во 2016 година, имотот бил ставен под хипотека кај една од комерцијалните банки.
Освен тоа, како што рече, како прилог понудиле и компаративна пракса, која се однесува на слични предмети. Барањето досега двапати им беше одбиено од судот, но од СЈО сметаат дека сопственоста на белата седумкатна палата треба да остане непроменета.
Таа ги отфрла обвинувањата на ВМРО ДПМНЕ дека СЈО работи во полза на власта и тврди дека барањето за замрзнување на имотот е за привремено обезбедување на имотот на партијата со цел заштита од можно негово отуѓување. Врховниот суд во наредните денови треба да донесе одлука дали ќе го прифати барањето за заштита на законитоста поднесена од СЈО.
СЈО во мај поднесе две барања до Кривичниот совет на Основниот суд Скопје 1 за обезбедување на имотот на ВМРО-ДПМНЕ, односно за определување на привремена мерка – забрана за отуѓување и оптоварување на дел од недвижен имот кој потекнува од извршено кривично дело. Кривичниот совет во двата наврати го одби барањето на СЈО. Последната инстанца каде можеше да се обрати СЈО е Врховниот суд.
Инаку, во случајот „Талир“ првоосомничен е Никола Груевски како лидер на ВМРО-ДПМНЕ, заедно со Кирил Божиновски, Илија Димовски, Даниела Рангелова, Александар Бичиклиски, Емил Димитриев, Миле Јанакиески, Иво Котевски, Илија Ристовски, Билјана Бришкоска – Бошковски, Леко Ристовски и Елизабета Чингаровска.
Според предистражната постапка на СЈО, од 2009 до 2015 година осомничените прифатиле незаконски средства за финансирање на партијата во вредност од 4,9 милиони евра. Овие пари, наместо да се вратат во буџетот како што налага законот, биле искористени за незаконско финансирање на партијата.
За да се „исперат“ овие пари, според СЈО, биле користени различни начини, а еден од нив биле наводни уплати на жиро-сметките на партијата од различни физички лица под превозот „донации“ и „членарини“.
Со овие средства, меѓу другото, биле склучени 71 договори за купување недвижен имот, а дел од овој имот не се користел за партиски, туку за приватни цели.
Катица Јанева не поднесе обвинение за предметот „Талир“, но најави дека ќе ја продолжи истрагата за незаконското финансирање на партијата која десет години беше на власт. Изминатите години ВМРО-ДПМНЕ се стекна со огромен имот и стана најбогата политичка партија во Европа.
СЈО за поднесените 17 обвиненија до сега од судот не добило нити еден одговор дали се прифатени или не.