Заменик министерот за правда, Оливер Ристовски смета дека Србија немала обврска да го задржи и уапси осудениот екс премиер, Никола Груевски, кога тој поминувал низ оваа земја во своето бегство до Унгарија.
Во интервју за „Политика“, Ристовски укажува на фактот дека за Груевски не била распишана меѓународна потерница, пренесува Б92.
-Колку што ми е мене познато, од Владата на Република Македонија немаше упатено критика кон Србија, ниту беше побарано објаснување за тоа што Груевски не е уапсен. Ниту една од соседните држави низ кои поминал Груевски, пред да биде распишана меѓународна потерница, не смеела да го уапси за дела кои се направени во Македонија. Не знам зошто воопшто е тоа предмет на дискусија, вели Ристовски.