Цената на парното од први август ќе рипне за 14,18 отсто, одлучи Регулаторната комисија за енергетика. Претседателот на РКЕ Марко Бислимовски рече дека новата цена на парното исклучиво зависела од цената на гасот кој поскапе за два пати од лани.
Бислимовски апелира до институциите на локално и на државно ниво да ги имплементираат препораките на ЕУ за штедење на енергија зашто еден степен помала температура прави заштеда од 5 проценти на енергенси.
„За просечна сметка од 1800 денари, значи дека ќе се зголеми за 250 денари. Од почетокот на годината цената на парното е зголемена за 28,18%, и доколку не беа субвенциите на владата од 23% сегашното зголемување на цената на парното ќе беше 51%, изјави Бислимовски.
Се предвидува ТЕ-ТО да обезбеди 70 проценти од потребната топлинска енергија, а 30 проценти да се обезбедат од топланите.
„Доколку не е можно да се увезат потребните количини на природен гас за производство на топлинска енергија во ТЕ-ТО и топланите, тогаш сета потребна топлинска енергија ќе мора да се произведе во топланите со користење на мазут, што е многу неповолно од еколошки аспект, и е ризично заради потенцијалната неможност да се обезбедат потребните количини на мазут, изјави Бислимоски. (Р.Н.)