Од Регулаторната Комисија за Енергетика апелираат на разумност и разбирање од граѓаните и трговците за честата променливост на цените на нафтата и нафтените деривати и пред се нивното покачување.
-Се наоѓаме во најкритичната недела кога цените на нафтата и нафтените деривати на светските берзи драстично се покачуваат што придонесува за нестабилност на пазарите. Покрај војната во Украина ова е војна со енергенси, но сепак најдобро од се е што има нафта иако со цени кои се многу високи, велат од Регулаторната Комисија.
Од таму информираат дека цената на енергенсите, според најновата методологија, ќе се утврдува на дневна основа врз база на просекот од изминатите пет дена од цената, не на Брент нафта туку од цената на петте нафтени деривати чиј процес на производство односно процесинг е многу скап.
Па така ако покачувањето е до 2 денари или има намалување до два денари на погоре споменатите параметри, од Регулаторна велат дека тогаш нема да има корекција на цените на нафтата и нафтените деривати, ако покачувањето и намалувањето е над 2 денари, тогаш ќе има и корекција на цените.
Ваквата методологија за пресметка на цените на дневно ниво врз база на изминатите 5-дневни просеци, била воведена на барање на трговците за поголема видливост и за да се избегнат ценовните шокови што сигурно ги има ако цената се формира врз база на дневните покачувања на нафтата на светските берзи, велат од Регулаторната Комисија за Енергетика.
– Ќе им биде вратена маржата на трговците со нафтени деривати која вчера им ја намаливме за 33% со што од 4,5 денари се симна на 3 денари, по усвојувањето на пакетот мерки од страна на Собранието и по стабилизирањето на цените на нафтата на светските пазари. Друга опција на располагање немаме, велат од Регулаторната Комисија.
Добра вест, оценуваат од Регулаторната комисија, е што и глобално веќе има реакции за вискоите цени на нафтата и дека Обединетите Арапски Емирати најавиле пуштање во промет на 60 милиони барели нафта и дека Јапонија, исто така, пуштила во оптек дел од своите нафтени резерви.
(М.Т.)