Роби Кин на Островот е познат како човек без влакна на јазикот. Во фокусот на ирската фудбалска легенда овојпат се најде Жозе Мурињо пред вечерашниот реванш дуел на Манчестер јунајтед против Селта во полуфиналето во Лига Европа.
„Клубот е во ситуација да ја освои Лига Европа и не постои никакво оправдување ако не го стори тоа“, смета Кин кој сета афирмација како активен фудбалер ја стекна со настапите за тимот од „Олд трафорд“.
Беше бескомпромисен на теренот за време на активната играчка кариера, а по пензионирањето Кин честопати знае јавно да изрази став по прашања поврзани со фудбалот.
„Мурињо има премногу оправдувања, но клубот е шести на табелата со 19 бода помалку од лидерот Челзи. Мислам дека на фудбалерите и на менаџерот треба да им е срам“, додаде поранешниот репрезентативец на Република Ирска.
„Црвените ѓаволи“ вечерва на „Олд трафорд“ ја дочекуваат Селта. По првиот меч во Шпанија имаат предност од 1:0. Во случај да триумфираат во натпреварување ќе стекнат право на учество во Лигата на шампиони за наредната натпреварувачка сезона оти шансите за тоа преку Премиерлигата им се, речиси, никакви. Во вториот вечерашен меч Олимпик во Лион ќе игра со Ајакс. Холандскиот состав има убедливи 4:1 од првата средба на „Јохан Кројф“ арена.