Судско рочиште за случајот „Транспортер“, во кој првообвинет е битолскиот градоначалник Владимир Талески, и денеска е одложено, поради отсуство на еден од обвинетите .
Судијката Лидија Петровска сугерираше да се одвои постапката и наместо една постапка за сите обвинети, да се водат посебни постапки за секој од нив. Таа рече дека предметот е обемен и постои опасност секогаш да фали по некој обвинет и судењето да се одлага во недоглед.
Обвинителот од СЈО Трајче Пеливанов, рече дека со оглед на тоа што обвинетите се соучесници, така би се искомплицирала постапката. Тој апелираше до обвинетите да комуницираат меѓу себе, да дојдат на следното рочиште сите, за да не прават бадијала трошоци од Битола до Скопје.
Еден од обвинетите, Џими Мицевски од Битола, побара постапката против него да се издвои, затоа што тој една година однапред имал закажано турнеја во Австралија и не можел да откаже. Како што рече Мицевски, пеналите што би ги платил во таков случај би биле многу виски.
„Не можам никако да ги одложам концертите. Договорени ми се пред една година. Ќе го зафркнам бендот со кој свирам. Закупивме сали во Австралија, потпишав договори. Ако не ги исполнам по моја вина, плаќам пенали во износ од 50 илјади долари”, рече Мицевски, кој свири во фолк групата Молика.
Судијката и обвинителите му посочија на Мицевски дека меѓу обвинетите има и лица кои се со изречени мерки и не е коректно нивните права да бидат прекршени за тој да може да си исполнува приватни обврски.
По половина час убедување, судијката и СЈО се согласија судењето да продолжи по 23 јануари за да може обвинетиот Мицевски да свири и за Стара нова година.
Ова е втор обид за почеток на судењето на Талески и уште 20-тина лица за злоупотреба на службената положба во врска со организирањето превоз на ученици во Битола, со што е направена проневера на околу 360.000 евра.
Минатото рочиште, на 28 септември, беше одложено исто така поради отсуство на една од обвинетите.
СЈО кон крајот на април поднесе обвинение за овој случај, но поради фактот што дел од обвинетите одбивале да ги примат поканите, судењето е закажано за септември.
Обвинението е за злоупотреба на буџетски пари поради незаконски организиран автобуски превоз.
Талески, како и претседателот на Комисијата за јавни набавки, кои во договор со директорите на училиштата и раководните лица на неколку превозни компании се обвинети дека организирале превоз за учениците во општината.