Прв натпреварувачки ден на Ролан Гарос и прво големо изненадување. Се случи на женскиот дел од турнирот што се игра за награден фонд од 42,66 милиони евра. Го приреди руската тинејџерка Анастасија Потапова, 81 на ВТА листата, која во воведниот настап ја елиминира трикратната гренслем шампионка и петта светска тенисерка, Анџелик Кербер со 6:4, 6:2.
„Овој терен има извонредна атмосфера. Благодарност до публиката за поддршката и на мојот тренер, секако. Навистина се чувствував посебно, цело време верував во себе и се мина по планот“, изјави 18 годишната Потапова по првиот триумф во кариерата над ривалка од топ 10 до кој стигна по час и 13 минути игра.
Кербер, пак, која во 2016 година ги понесе титули од Австралија опен и од Ју-Ес опен, а во 2018 година и од Вимблдон, призна дека повредата на зглобот не е изговор за поразот. Поради незгодата ја пропушти, речиси, целата сезона на земјена подлога, го откажа учеството на Мастерсите во Мадрид и во Рима и во Париз долета со само три меча.
„На крајот на краиштата, и не очекував многу од турнирот иако имав добро чувство пред почетокот. Имав можност да тренирам добро во изминатите денови, но тоа не беше долга подготовка за сезоната на земја. Едноставно бев среќна што вооопшто ќе играм меѓутоа, секако, ова не беше по планот“, рече Кербер која има два пласмана во четврт-финале на Ролан Гарос.
Потапова во второто коло ќе игра против Маркета Вондрусова од Чешка која во два сета (6:4, 6:3) славеше против Кинеската Јафан Ванг.