Кристијано Роналдо влезе во судница по предметот во кој се сомничи за затајување на данок и оштетување на шпанската државна каса за 14,7 милиони евра. Ѕвездата на мадридски Реал и на португалската репрезентација се бранеше дека не сторил никакво кривично дело и притоа беше духовит кон судијката Моника Гомез Фереира изнесувајќи и детали од приватниот живот.
„Се имам платено за 2014 година. Не се разбирам во многу работи надвор од фудбалскиот терен. Ако луѓето од опкружувањето ми речат „Крис, тоа и тоа е добро“, јас им верувам. Не знам ништо за данок. Како можам да мамам за данок кога имам завршено само шест одделенија во основно училиште?“ – Како можам да затајам данок?“, се правдаше Роналдо.
Фудбалската ѕвезда потоа се обрати до судијката со свое уверување оти немаше да биде во судница да не бил позната личност.
„Да не се викав Кристијано Роналдо, немаше да седам овде“, рече Португалецот.
На тоа судијката му возврати дека греши и дека на негово место и ситуација биле многу анонимни лица.
„Грешите. Многу анонимни луѓе биле во ваша позиција. Вие сте под истрага за криминални работи што се засновани на докази“, му одговори Фереира.
Роналдо малку ретерираше и појасни дека со тоа што го кажал немал намера да издејствува подобар третман бидејќи е славен.
„Го сакам тоа, но само на терен. Не и овде. Во судницава треба да имам ист третман како сите други луѓе. Навистина не знам зошто сум овде. Чесен сум и секогаш сум плаќал данок. И мојот агент Жорж Мендеш е чесен. Ниту тој не треба да биде овде“, истакна Роналдо.