Македонија испишува историја, не само национална туку и европска. Со Договорот потпишан со Грција за надминување на разликите околу името имаме уникатна шанса за отворање на вратите на ЕУ и НАТО. Би сакал што посокоро македонските пријатели да ги видам во групата пријатели обединети во двете асоцијации, истакна денеска во Охрид државниот министер за Европа при германското МНР Михаел Рот кој се наоѓа во работна посета на Македонија.
– Би сакал да ги охрабрам луѓето во вашата прекрасна земја да ја прифатат оваа историска можност. Доколку го поддржите договорот, тоа ќе биде значаен знак дека Македонците се силно посветени на демократијата, владеењето на правото, независноста на судството, тие ќе станат круцијален дел на обединета Европа. Мора да ја продолжиме нашата соработка, нашето пријателство, заедничките обврски, така што сум голем оптимист во таа насока, истакна тој.
Државниот министер Рот на интерактивната дебата „Македонија на патот на ЕУ“ одржана на Античкиот театар во Охрид во присуство на македонскиот министер за надворешни работи Никола Димитров, заменик-министерот за животна средина и просторно планирање Јани Макрадули, градоначалникот на Охрид Јован Стојаноски, уште изрази задоволство што голем број Македонци живеат и работат во Германија, посочувајќи ги како значајен сегмент што придонесува во збогатувањето на германското општество, но и економијата.
– Сакаме да го олесниме начинот на кој тие можат да дојдат и да работат во Германија, но сепак за тоа постои режим воспоставен во рамки на ЕУ и Шенгенската зона. Она што е наша интенција е сепак да се изнајдат начини за поедноставување на таа процедура, рече Рот, истовремено посочувајќи ја заинтересираноста на германските компании за инвестирање во Македонија, како начин за отварање нови работни места и севкупно подобрување на животниот стандард на македонските граѓани, особено за помладите генерации.
Шефот на македонската дипломатија Димитров од своја страна истакна дека посетите на канцеларката Ангела Меркел, денешната посета на Рот, како и веќе најавените посети на неговиот германски колега, како и министерката за одбрана, се потврда на силниот интерес на Германија за Македонија конечно да застане на нозе и да зачекори напред.
– На 30 септември имаме голема, историска крстосница. Мислам дека ќе успееме, влогот е голем, пораките се јасни, никој не знае дали оваа наша генерација ќе има следна шанса. Јасно е дека Договорот тешко поминува и во Грција тоа значи дека е одвај најден заеднички јазик. Ние сме Македонци, зборуваме на македонски јазик, вчера премиерот во Стразбур првпат се обрати на македонски јазик, доби овации. И ако вчера Европарламентот стана на нозе за европска Македонија, ние ќе станеме на нозе за истата кауза и на 30 септември, рече Димитров.
Македонскиот МНР нагласи дека се работи за целосно напартиско прашање, што нема врска со Влада, со градоначалниици, не се локални ниту парламентарни избори туку, како што рече, за иднината на Македонија и сите нас како нејзини граѓани.
– Десет години да зборувате за референдум и на секое можно прашање да велите дека кога ќе најдеме заеднички јазик со Грција ќе ги прашаме граѓаните, а потоа повторно да немате јасен став тоа е бегање од одговорност и бегање од соочување со волјата на народот. Што не е добро за партија што често се дрзнува да зборува во име на народот. Народот зборува преку гласање, беше коментарот на Димитров по однос ставот на најголемата опозициска партија околу престојното референдумско изјаснување.
Во врска со македонските национални кодови, Димитров рече дека тие остануваат и „МК“ и „МКД“, а по однос трговските марки прашањето не е затворено со Договорот од Преспа.
– Договорот само кажува како тоа прашање ќе се третира, додека не се најде решение останува се по старо, без наша согласност и нивна не може ништо да се смени. Ние имаме повеќе трговски марки со предзнакот „Македонија“, „Македонско“, итн… Ќе се формира заедничко тело со меѓународни експерти, кое ќе најде начин како тоа ќе функционира. Оаа не е важно само за идентитетскиот дел, туку и за комерцијалниот интерес, рече Димитров.
Дел од обраќањата на трибината во Охрид беа посветени и на активностите посветени на заштита на животната средина, за кои зборуваше заменик-министерот Макрадули.
– Овде зборуваме зошто ЕУ, а поврзано со животната средина, конкретно како ќе го третираме опадот во Македонија. Тука сме во регион во која во овој миг има осум илегални депонии, во кои секојдневно се загадува почвата, водата, воздухот, Ние го следиме европскиот концепт, преку регионално менаџирање на отпадот и сметам дека тие европски вредности ќе доминираат и со секојденвната комуникација со граѓаните при донесувањето конечни одлуки, рече Макрадули, истакнувајќи дека ресорното Минситерство веќе спроведува активности за чистење на повеќе депонии низ целата земја, од кои едната на самиот влез во Охрид.