Претседателот на Бугарија Румен Радев денеска ќе има консултации со претставници на пратеничките групи во Народното Собрание, пред да го врачи по трет пат мандатот за формирање нова влада во рамките на актуелниот парламент, откако првите два беа неуспешни.
Радев, по враќањето од посетата на Црна Гора, рече дека ќе има консултации со сите парламентарни партии за да ги слушне начините за излез од политичката криза и какви модели и политики ќе бараат поединечните партии за коалиција пред да одлучат на кого од „Демократска Бугарија“, Бугарската социјалистичка партија или „Има таков народ“, да го предаде третиот мандат за формирање нова бугарска влада.
Доколку и овој обид не успее, тогаш претседателот на Бугарија е должен да го распушти Народното собрание, да закаже предвремени парламентарни избори и да назначи преодна влада која ќе ги организира изборите во рок од два месеци. Како најверојатен датум за нивното одржување, Радев го гледа почетокот на октомври, а правниците очекуваат тие да се одржат на 2 или 9 октомври. (МИА)