Руското Министерство за надворешни работи соопшти дека меѓународната заедница треба да се фокусира на давање помош на Венецуела во решавање на економските и на социјалните проблеми на земјата и да се воздржи од „деструктивно“ мешање во нејзините внатрешни прашања.
Соопштението од руското Министерство за надворешни работи дојде по најавената можност од американскиот претседател Доналд Трамп за испраќање војска во Венецуела, како и дека го одбил барањето на венецуелскиот претседател Николас Мадуро за средба.
„Тоа, секако, е опција“, истакна Трамп за испраќање на војска во Венецуела.
ЕУ му дадоа рок од осум дена на актуелниот претседател на Венецуела, Николас Мадуро да организира „фер, слободни и кредибилни избори“, а во спротивно Унијата „ќе преземе мерки во однос на признавањето на лидерството“. Рокот од ЕУ истекува вечерва.
Претходно француската министерка за европски работи Натали Лоазо најави дека Париз ќе го признае Гуаидо како привремен претседател на Венецуела ако Мадуро до вечер не распише избори.
„Ако Мадуро до вечер не се обврзе дека ќе организира претседателски избори, во тој случај Франција ќе го смета Хуан Гуидо за легитимен да организира избори и него ќе го сметаме за привремен претседател до одржувањето на легитимни избори во Венецуела“, истакна Лоази.
Таа предлогот на Мадуро тој да организира предвремени парламентарни избори го оцени како фарса.
Австрискиот канцелар Себастијан Курц денеска изјави оти разговарал со венецуелскиот опозициски лидер Гуаидо и дека се придружува кон земјите-членки на Европска унија кои соопштија дека ќе го признаат Гуаидо за привремен претседател на Венецуела доколку Владата во Каракас не распише претседателски избори.