Војната во Украина ја продлабочи кризата во односите меѓу Русија и Западот, а руските власти изјавија дека конфликтот влегува во најопасната ескалација до сега.
Но, директното обвинување на САД за нападот на Крим – кој Русија еднострано го анектираше во 2014 година, иако поголемиот дел од светот го смета за дел од Украина – е чекор понатаму, се наведува во напис на Ројтерс.
Од Кремљ, во понеделникот целосно ги обвинија Соединетите држави за нападот на Крим со проектили ATACMS испорачани од САД во кои загинаа најмалку четири лица, а 151 беа повредени, а Москва официјално го предупреди американскиот амбасадор дека ќе следи одмазда.
Според руските власти, најмалку две деца се убиени во нападот на Севастопол во неделата, прикажани луѓе како бегаат од плажа во близина на Севастопол, а некои од повредените се носени на носилки. Од Кијив не го коментираа нападот, но негираат дека мета биле цивили.
Од Русија инсистираат дека САД го испорачале оружјето, додека американската војска го насочила и обезбедила податоци.
„Треба да ги прашате моите колеги во Европа, а пред се во Вашингтон, секретарите за печат, зошто нивните влади убиваат руски деца“, им рече на новинарите портпаролот на Кремљ, Дмитриј Песков.
Руското Министерство за надворешни работи ја повика американската амбасадорка Лин Трејси и ѝ кажа дека Вашингтон „води хибридна војна против Русија и всушност стана страна во конфликтот“.
„Дефинитивно ќе следат одмазднички мерки“, се вели во соопштението на Руското МНР.
Трејси рече дека Вашингтон жали за каква било загуба во цивили, изјави за новинарите портпаролот на Стејт департментот Метју Милер, додавајќи дека Вашингтон и дал оружје на Украина за да може да ја брани својата суверена територија, вклучително и Крим.
Понатаму, се наведува во написот, портпаролот на Пентагон, мајорот Чарли Диц изјави дека Украина сама носи одлуки за таргетирање и спроведува свои воени операции.
Американски официјален претставник подоцна изјави дека Украина не цели кон цивили.
„Изгледа дека Русите успеаја да пресретнат проектил ATACMS кој цели на фрлач на ракети, а ATACMS експлодираше со шрапнели кои паѓаа на плажата, изјави понатаму американскиот функционер.
Путин во изминатиот период постојано предупредуваше на ризикот од многу поширока војна во која ќе бидат вклучени најголемите нуклеарни сили во светот, иако тврди дека Русија не сака конфликт со НАТО алијансата предводена од САД.
Руски мерки за одмазда
Путин ја претставува војната во Украина како дел од пошироката борба со САД, за кои вели дека ги игнорирале интересите на Москва по распадот на Советскиот Сојуз во 1991 година, а потоа планирале да ја расцепат Русија и да ги заземат нејзините природни ресурси.
Откако Соединетите Држави и дозволија на Украина да насочи дел од американското оружје во Русија, Кремљ испрати сигнали дека тоа го смета за сериозна ескалација, а Путин нареди вежби за практикување на распоредување на тактичко нуклеарно оружје, сугерираше дека Русија може да стационира конвенционални ракети на растојание од САД и нивните сојузници и потпиша договор за заемна одбрана со Северна Кореја.
Американскиот претседател Џо Бајден ја отфрли можноста за испраќање американски војници да се борат во Украина и веднаш по целосната руска инвазија во 2022 година изјави дека директна конфронтација меѓу НАТО и Русија би значела Трета светска војна.
Лидерите на Западот и Украина ја опишуваат војната како грабеж на земјиште во империјален стил. Западот негира дека сака да ја уништи Русија, која пак негира дека има намера да изврши инвазија на која било земја членка на НАТО.
Вашингтон сè уште му забранува на Кијив да ја нападне признатата руска територија со ATACMS, кои имаат дострел до 300 километри, и други американско оружје со долг дострел.
Путин минатата недела изјави дека Русија би можела да и испорача оружје на Северна Кореја, како што тој посочи дека ќе биде сличен одговор на западното вооружување на Украина.
На прашање каков ќе биде рускиот одговор за нападот на Крим, Песков потсети на зборовите на Путин на 6 јуни за пошироко поставување на конвенционално оружје.
„Се разбира, вклучувањето на САД во борбите, како резултат на кои умираат мирољубиви Руси, не може а да нема последици“, рече Песков.
Подготви: Д. Тахири / Цивил Медиа