Руската армија уништи клучен енергетски објект во Херсон со артилерија и беспилотни летала, што може да предизвика прекини во снабдувањето со електрична енергија, најави шефот на регионалната воена управа во тој град, Александар Прокудин.
„Русите повеќе од еден ден масовно напаѓаат една од најважните компании на нашата енергетска инфраструктура, со што уште еднаш цинично ги прекршуваат сите договори“, објави Прокудин на Телеграм, пренесе Укринформ.
Како што наведе, артилериските и нападите со беспилотни летала траеле цела ноќ, а и покрај обидите на украинските сили да го одбранат објектот, руските војници до утрото го уништиле.
„Енергетските експерти деноноќно работат на стабилизирање на состојбата, бараме граѓаните рационално да ја користат електричната енергија бидејќи во наредните денови можни се принудни прекини во снабдувањето со електрична енергија“, рече Прокудин.