Долниот дом на рускиот Парламент денеска донесе едногласна одлука за официјално повлекување на Москва од договорот за отворено небо, соопштија руските медиуми по гласањето одржано неколку часа пред првиот самит на шефовите на дипломатиите на двете земји.
„Отворено небо“ е меѓународен договор од 1992 година, што овозможува проверка на воените движења и мерките за ограничување на оружјето на земјите потписнички и дозволува невооружени летови за надзор над земјите членки.
Поранешниот американски претседател Доналд Трамп во ноември лани одлучи да ги повлече САД од овој договор, што беше еден од неговите последни потези како претседател.
Вашингтон ја обвини Русија дека го прекршува договорот, што Москва го негираше уште во јануари кога соопшти дека и таа ќе се повлече од договорот.
Излегувањето на САД од овој договор следеше откако земјата во 2018 година се повлече од договорот за иранската нуклеарна програма, како и од договорот ИНФ за ракети со среден дострел, откажан во 2019 година.
Гласањето во Думата се одржа неколку часа пред првиот состанок на министрите за надворешни работи на двете земји, Сергеј Лавров и Антони Блинкен, на маргините на министерскиот состанок на Арктичкиот совет во Исланд, што треба да биде увертира на самитот на нивните претседатели Џо Бајден и Владимир Путин во јуни.
Француските медиуми пренесуваат дека пред денешното гласање рускиот заменик министер за надворешни работи Сергеј Рјабков изјави дека Москва „јасно им посочува на Американците дека во случај на конструктивно решение (…) Москва може да размисли да остане во договорот“