Поранешниот руски шпион Сергеј Скрипал повеќе не е во критична состојба по труењето со нервен отров, рекле од болницата, а пренесе Би-би-си.
Од болницата кажале дека Скрипал добро реагира на третманот и „брзо заздравува“.
Сергеј Скрипал и неговата ќерка Јулија се во болница повеќе од еден месец откако беа најдени онесветени на клупа во Солзбери. Тие беа отруени со токсичен нервен агенс – Новичок.
Владата на Велика Британија тврди дека Русија стои зад нападот, но Москва негира каква било вмешаност, нарекувајќи ги обвинувањата „ужасни и неосновани“.
Д-р Кристин Бланшард, медицинска директорка во окружната болница Солзбери, рече: „Минатиот четврток информирав дека состојбата на Јулија Скрипал се подобри и стана стабилна. Како што вели самата Јулија, нејзината сила расте секојдневно и таа едвај го чека денот кога ќе биде доволно добро за да ја напушти болницата. Секоја шпекулација за тоа кога ќе биде тој датум е токму тоа – шпекулација. Во меѓувреме, Јулија побара приватност додека продолжува да заздравува – и ги повикувам медиумите тоа да го почитуваат“рече Бланшард.
„Исто така, сакам да ве информирам за состојбата на нејзиниот татко Сергеј Скрипал. Тој добро реагира на третманот, брзо заздравува и веќе не е во критична состојба“, кажа докторката.