Основното јавно обвинителство ќе докаже преку доказите дека четворицата обвинетите се виновни за организација на насилствата на 27 април. Екс спикерот на Собранието, Трајко Вељаноски, ексминистрите Миле Јанакиески и Спиро Ристовски, како и ексдиректорот на УБК, Владимир Атанасовски, пак, рекоа дека не чуствуваат вина на денешното судско рочиште во Кривичниот суд.
„Ќе слушнете како Јанакиески и Ристовски критичниот ден се јавувале по штабовите и организирале превоз до Скопје за поголема масовност на протестот и за влегување на народот во Собрание. Ќе ги слушнете пораките испратени до луѓето. Вратите ги отворија затоа што така им беше кажано од обвинетите, но и од нивниот лидер, Никола Груевски, кој толку сакаше да се соочи со народот на избори, но кога требаше да се соочи со правдата најкукавички избега. Трајко Вељаноски постапи спротивно на деловникот на Собранието, одби да се изврши промена на точките на дневен ред по барање на Оливер Спасовски кого го поддржуваа повеќе од 10 пратеници, но затоа не заборави да се допишува со Груевски. Дали Трајко Вељаноски се обиде да ги спаси пратениците, да го спречи лудилото одговорот е едноставен – не. Не само што не направи ништо, туку неговиот шеф на обезбедувањето Горан Ѓошевски на групата предводена од Никола Митревски-Кољо им помогна да стигнат во сала број 3 каде тогаш се наоѓаат пратениците од новото парламентарно мнозинство“, рече обвинителката Русковска во воведниот говор.
Русковска воведните зборови ги заврши со цитат од Гоце Делчев.
„Јас не познавам друг народ кој повеќе страдал од предавствата на своите синови – изроди како македонскиот. Историјата не памети друг таков пример кога еден ист народ по традиција, јазик и вера се разделува на разни спротивни страни, една од друга потуѓа“.
Обвинетата четворка пред судот кажа дека не чувствува вина за кривичното дело „терористичко загрозување на уставниот поредок и безбедноста“. Во истрагата за организаторите беа опфатени и експремиерот Никола Груевски и поранешниот разузнавач Никола Бошкоски, но затоа што тие се во бегство, како што соопштија од Обвинителство при поднесувањето на обвинението, постапката за нив ќе продолжи кога тие ќе бидат пронајдени.
Првообвинетиот Вељаноски обвинението за овој настан го нарече класичен политички прогон и дополни дека не чувствувал ни малку вина за овој настан. Истиот став дека се работи за политички прогон го дели и обвинетиот Ристовски кој исто така посочи дека не чувствува вина. Дека не е виновен за настаните во Собранието рече и обвинетиот Јанакиески кој дополни дека ќе се обидел пред судот да направи реконструкција на овој настан со цел јавноста да ја дознаела вистината. И обвинетиот Атанасовски, како и претходните тројца обвинети, рече дека не чувствува вина и дека разбрал за што е обвинет.
На наредното судење закажано за деветти март и обвинетите ќе го кажат својот воведен говор. Тогаш за сведоци ќе бидат повикани техничкиот премиер Оливер Спасовски, но и Михалил Младеновски, кој беше обвинет за првиот дел од предметот, а потоа и амнестиран. Тој за време на неговиот распит при судењето го посочи Владимир Атанасовски како еден од нарачателите.