Обвинителката Вилма Русковска рече дека изречената казна против третообвинетиот во случајот „Рекет“, Зоран Милески-Кичеец е добра, но дали ќе вложи жалба за висината на санкцијата ќе одлучи по примање на пресудата.
„Мислам дека изречената санкција е добра. Дали ќе вложам жалба за висината, ќе решам откако ќе ја примам пресудата. Искрено не очекував повика казна затоа што, сепак, е голем распонот на предвидената казна од една до 10 години, досега е неосудуван и најмногу затоа што призна вина пред почеток на главната расправа“, рече Русковска во изјава за медиумите пред Кривичниот суд во Скопје.
Таа не ја исклучи можноста за Милески во наредниот период да се појави во улога на сведок во постапката против првообвинетиот во случајот „Рекет“, Бојан Јовановски и второобвинетата, Катица Јанева.
„Милески може да се појави како сведок во случајот. Во таква улога може да биде по предлог на обвинителството или на одбраната во дополнување на доказна постапка“, додаде Русковска.
Зоран Милески-Кичеец, третообвинет во случајот „Рекет“, доби три години затвор за примање награда, откако во текот на вчерашниот ден призна вина. Судот одлучи тој да остане во домашен притвор откако претходно ги сослуша аргументите на обвинителството и одбраната. Обвинителската Вилма Русковска предложи продолжување на куќниот притвор до издржување на казната, а адвокатите на Милевскли пак бараа да се укине, затоа што треба да се грижи за неговиот болен татко, и дека не планира да бега. Тие истакнаа дека и досега секогаш бил достапен и признал вина.
Првоосомничениот Бојан Јовановски и второосомничената Катица Јанева се изјаснија дека не се виновни. По признанието на Кичеец, судот ја одвои постапката, а рочиштето против Јанева и Боки 13 ќе продолжи на 6 декември.