Соединетите Држави планираат да ја зголемат воената помош за земјите од регионот на Црното Море, особено Бугарија, Украина, Романија и Грузија. НАТО е посветен на зголемување на своето присуство во регионот, особено во рамките на четирите нови борбени групи во Романија, Бугарија, Унгарија и Словачка. САД ќе ги поддржат црноморските земји во нивните напори да ја спречат корупцијата, како и да ја зголемат поддршката за иницијативата Три мориња на земјите од Централна и Источна Европа.
Ова е предвидено со нацрт-законот за безбедност на регионот на Црното Море, дел од идниот американски Закон за безбедност на Црното Море доставен до Сенатот и Претставничкиот дом на САД, каде што допрва треба да биде усвоен.
Меѓу причините што ги наведува Конгресот, се издвојуваат неколку.
Според нив, регионот на Црното Море е од клучно значење за националната безбедност на шест земји: Украина, Грузија, Молдавија, Романија, Бугарија и Турција. Црноморскиот регион е област на зголемена тензија и конфликт на источната граница на Европската унија и НАТО по инвазиите на Владимир Путин на Украина во 2014 и 2022 година. По нелегалниот обид за анексија на украинскиот регион Крим во 2014 година, Руската Федерација ја зајакна Црноморската флота за да го зголеми своето присуство во регионот и ја загрозува слободата на пловидба. Русија го дестабилизира регионот преку кампањи за малигни влијанија.
Од руската инвазија на Украина во 2022 година, единството меѓу државите од регионот на Црното Море се зајакна, особено меѓу земјите-членки на НАТО Романија, Бугарија и Турција. Русија го користи регионот на Црното Море за да спроведе воени вежби кои го загрозуваат територијалниот суверенитет на Украина и убиваат невини цивили. Русија има долга историја на користење на својата позиција во Црното Море и Крим за да им се закани на сојузниците на НАТО. Присуството на Соединетите Американски Држави во Црното Море се намали по руската анексија на Крим поради недостаток на достапни бродови и ресурси и недостаток на јасно дефинирана регионална стратегија.
Главниот заклучок е дека Русија се обидува да ги искористи понекогаш различните приоритети на членките на НАТО во регионот за да ја засили својата експанзионистичка реторика.
Генерално, неиспровоцираната војна на Руската Федерација против Украина ја истакна важноста на регионот на Црното Море за националните безбедносни интереси на Соединетите Држави, се нагласува во нацрт-законот. Акциите на Русија во и околу Црното Море го нарушија пристапот до енергетските ресурси низ Европа.
„Конкретно, на 27 април 2022 година, Гаспром ја прекина испораката на природен гас за Полска и Бугарија, откако двете земји одбија да се усогласат со руската уредба од 31 март 2022 година, сите плаќања да се вршат во рубли, што ги прекршува нивните договори со Гаспром“, се вели во текстот.
Во однос на Турција, наодите се дека таа се спротивставува на обидите да се промени толкувањето на Конвенцијата од Монтре со цел да не се ослабне нејзината позиција во регионот.
Кина исто така се појавува како закана за регионот на Црното Море.
„Присилната економска политика на Народна Република Кина (НРК), исто така, ја загрозува економската стабилност на регионот на Црното Море“, се тврди во документот.
Конгресот верува дека е во интерес на Соединетите Држави да го спречат ширењето на натамошниот вооружен конфликт во Европа со признавање на регионот на Црното Море како арена на руска агресија, а приморските членки на Црното Море се од клучно значење за спротивставување на агресијата на руската влада и за одржување на колективната безбедност на НАТО Алијансата. Соединетите Држави треба да продолжат да работат во рамките на НАТО за да развијат долгорочна стратегија за подобрување на безбедноста и воспоставување постојано и одржливо присуство на источното крило, се вели во образложението на законот.
Исто така, се препорачува враќање на довербата и билатералните односи со Турција, која е „клучен сојузник во регионот на Црното Море и бедем против Иран“.
Земјите од регионот на Црното Море треба да работат на подобрување на комуникацијата и размената на разузнавачки информации и зголемување на капацитетите за сајбер одбрана.
„САД треба да ја поддржат иницијативата преземена од земјите од Централна и Источна Европа за унапредување на Фондот за иницијатива ‘Три мориња’ за зајакнување на поврзаноста на транспортот, енергијата и дигиталната инфраструктура во регионот на Јадранот, Балтикот и Црното Море“, се вели во текстот за препораките на Конгресот.
Спротивставувањето на принудните економски аспирации на Кина останува важен политички императив со цел понатамошна интеграција на црноморските држави во западните економии и подобрување на регионалната стабилност.
Меѓу главните приоритети се воената помош, вклучително и инфраструктурата за поддршка на зголеменото распоредување и логистиката за снабдување во регионот; економска помош, вклучително и поддршка за кризата со безбедноста на храната; спротивставување на руската дезинформација и пропаганда во регионот на Црното Море; енергетска диверзификација и интеграција на регионалните пазари и набавки; зголемување на билатералната трговија и американските инвестиции во регионот; зголемување на пристапот до глобалните пазари на капитал; зајакнување на напорите за владеење на правото и борба против корупцијата; оценка за ангажманот на НАТО во регионот, особено оној во рамките на четирите нови борбени групи во Романија, Бугарија, Унгарија и Словачка.
Меѓу наведените идни политики на САД во однос на регионот се воспоставување постојано, одржливо присуство на источното крило и зајакнување на демократската отпорност на тамошните сојузници, зголемување на инвестициите во земјите од регионот на Црното Море и оттука САД ќе ги поддржат црноморските земји во напорите за спречување на корупцијата, и иницијативата „Три мориња“ на земјите од Централна и Источна Европа.
Меѓу главните стратегии за безбедност и развој на Црното Море е онаа за зголемување на воената помош за земјите од регионот на Црното Море, особено за Украина, Романија, Бугарија и Грузија.
Се размислува и за создавање заеднички, мултинационален штаб во Црното Море, кој би бил одговорен за планирање, подготвеност, вежби и координација на сите воени активности во регионот.
Ќе се направат напори и за поголема слобода на пловидба, пред се со Турција, Украина, Романија и Бугарија, за да се овозможи поголема безбедност и економски пристап до Црното Море.
Претставници на високо ниво на Стејт департментот или други партнерски агенции ќе бидат испратени во регионот на Црното Море не помалку од двапати годишно, како и на главните регионални форуми за инфраструктура и енергетска безбедност, вклучувајќи го и состанокот на високо ниво на иницијативата „Трите мориња“. (Р.Н.)