Аферата со наводното руско мешање во ланските избори за претседател на САД, може да влезе во нова етапа уште денеска, кога според локални медиуми се очекува да бидат подигнати првите обвиненија во рамки на истрагата што ја води специјалниот обвинител Роберт Мјулер.
Американските разузнавачки служби донесоа заклучок во јануари дека Русија се вмешала во изборите во обид да му помогне на Доналд Трамп да ја победи Хилари Клинтон со кибер напад и објавување и-мејли, како и нејзина дискредитација на социјални мрежи.
Мјулер, кој е поранешен директор во ФБИ, истражува дали има врски меѓу соработници на Трамп и странски влади, како и евентуални шеми за перење пари, затајување даноци и друг финансиски криминал, нагласуваат извори запознати со истрагата.
Трамп ги отфрла тврдењата за тајни договори со Руси и вели дека истрагата е „лов на вештерки“.
Кремљ исто така негира дека е вмешан на каков било начин во американските избори.
Тимот на Мјулер ја врши работата дискретно и досега ништо не е излезено во јавност за осомничените, како и за обвиненијата што ќе бидат подигнати.
Според Си-Ен-Ен, судски тим одобрил во петокот прво обвинение и денеска е можно да биде приведен најмалку еден осомничен.
Трамп во врска со истрагата, на Твитер изнесе нови критики на сметка на поранешниот кандидат на Демократската партија, Хилари Клинтон нагласувајќи дека „фактите се појавуваат“.
– Направете нешто, напиша тој на Твитер.
Неговиот твит е објавен откако Си-Ен-Ен јави дека сојузна порота во Вашингтион одобрила први обвиненија во кривичната истрага за руско наводно мешање во американските избори. Во твитовите Трамп нагласи дека кампањата на Клинтон помогнала за политичко истражување за него што покрена тврдење за негови врски со Русија.
– Тие бараат телефонски индиции Трамп/Русија што не постојат. Демократите го користат овој лов на вештерки што е ужасен и лош за нашата држава за лоша политика, но сега Русија возвраќа како никогаш претходно. Има премногу виновни меѓу демократите и сега фактите се појавуваат. Направете нешто,напиша Трамп.