Американската амбасада во земјава апелира да се почитуваат законите и сите да соработуваат со Специјалното обвинителство при неговите истраги. Како што велат од Амбасадата за НОВА, СЈО мора да има можност да спроведе длабока истрага за да се стави крај на политичката криза.
– Специјалното обвинителство мора да има можност да спроведе длабока, независна и истрага ослободена од препреки и одлагања и владините институции и политички партии треба да соработуваат во тие процеси. Според Договорот од Пржино, воспоставувањето одговорност за неовластеното прислушување и индициите за владини злоупотреби се клучен чекор за да се заврши политичката криза и да се врати земјата на патот за членство во ЕУ и НАТО, одговара Американската амбасада на прашањето на НОВА за опструкциите со кои се соочува СЈО.
Тимот кој го предводи Катица Јанева веќе втор ден во Управата за безбедност и контраразузнавање се обидува да добие материјали клучни за да се спроведе истрагата кој всушност прислушувал во Македонија, но истиот наидува на опструкции од највисокиот врв во УБК.
Јанева неодамна соопшти дека при претресот со судски налог во УБК, покрај првиот човек Владимир Атанасовски, присутни биле и дополнителниот заменик-министер за внатрешни работи, Оливер Андонов и поранешниот прв човек на полицијата Митко Чавков, без притоа да се разјасни зошто се таму.
Вчера СЈО поднело и предлог за казнување на директорот на УБК Атанасовски, бидејќи одбивал да постапи на повеќе барања поднесени кон УБК од страна на СЈО.
Атанасовски не одбивал да постапи само по вчерашната судска наредба, туку и кон многу други барања коишто СЈО ги упатувало кон него во изминатиот период, не само за „Пуч“, туку и за многу други предистражни постапки.
Предлогот е доставен од Основниот суд – Скопје 1 којшто треба да одлучи за казнување на Атанасовски, а според Кривичниот законик казната е парична, и тој би можел да биде казнет од 2,5 до 5 илјади евра.