Саџид Џавид е назначен за нов министер за внатрешни работи на Велика Британија, откако Амбер Руд поднесе оставка, јави „Би-би-си“.
Џавид е син на пакистански мигрант, кој во 1960-тите години дошол во Велика Британија и работел како возач на автобус.
Тој досега бил министер за локална самоуправа и домување, а бил и поранешен директор на Дојче банк.
Амбер Руд поднесе оставка поради обвинувањата дека ги довела во заблуда застапниците во поглед на третманот со имигрантите, како и поради справувањето со т.н. „Скандал Виндраш“.
Притисокот врз Руд се зголеми откако весникот „Гардијан“ објави дека на жителите на островот кои во Велика Британија пристигнале од Карибите во децениите по Втората светска војна, неодамна им била одбиена медицинската нега во Британија, а им биле упатени и закани за протерување бидејќи немаат документи кои го докажуваат нивното право на престој.
Станува збор за британски граѓани кои припаѓаат на т.н. „генерација Виндраш“, наречена по бродот „Емпајр Виндраш“ со кој во годините по Втората светска војна стотици карипски мигранти дошле во Велика Британија за да помогнат во обновата на земјата по војната.
Иако како граѓани на поранешните британски колонии имаат право на легален престој во Велика Британија, положбата им е отежната поради новите, построги правила воведени во 2012 година.
Градоначалникот на Лондон, член на опозициските лабуристи, Садик Кан изјави дека тоа што се случило со „генерацијата Виндраш“ не е исклучок, ниту административна грешка, туку последица на непријателското опкружување кое го создала владата на Конзервативците.
Инаку, повлекувањето на Руд, еден од најблиските министри до Тереза Меј, се толкува како голем удар за британската премиерка пред локалните избори закажани за 3 мај.