Не сме сè уште подготвени за целосно укинување на мерките кои се воведоа како резултат на пандемијата со ковид-19, изјави денеска министерот за здравство, Беким Сали.
Тој нагласи дека ја следат состојбата и, според тоа што го добиваат како резултат од нивните анализи, сметаат дека уште не e време за целосно укинување на мерките или нивно намалување.
– Ние како Министерство за здравство и Институтот за јавно здравје, нормално и преку Комисијата за заразни болести постојано следиме што се случува со државите коишто ги прекинаа мерките. Таму имате нагло враќање, односно зголемување на бројот на новоинфицирани и според новата методологија која што се практикува во сите држави, а тоа е мерење на ризикот врз здравствениот систем, не за поединците. Еден од индикаторите е бројот на новозаразени, но важен податок е и бројот на пациенти коишто се хоспитализираат, рече Сали и додаде дека „според таа состојба, ние уште не сме спремни за намалување на мерките, но дел од ковид центрите во државата се затворени и нема потреба од дополнителни кревети“.