Претседателот на Владата на Република Северна Македонија Зоран Заев, вицепремиерот за европски прашања, Никола Димитров, и министерот за надворешни работи Бујар Османи денеска ќе учествуваат на Самитот на ЕУ за Западен Балкан.
Во пресрет на Самитот, многу угледни европски и светски медиуми излегоа со воздржани очекувања од Собирот во поглед на одредување временски рок во кој Унијата би се заложила за прием на земјите од Западен Балкан.
Американскиот претседател Џо Бајден во телефонски разговор со шефицата на Европската Комисија Урсула Фон дер Лајен, побарал Европската Унија да им овозможи на земјите од Западен Балкан јасна европска перспектива а Северна Македонија да биде дел од проширувачкиот процес.
И денеска , медиумите лиферуваат изјави од европски лидери и прогнози за содржината на Декларацијата како финален документ од Самитот.
Австрискиот канцелар Себастијан Курц синоќа во Љубљана истакна дека Австрија би сакала датум за проширување на ЕУ за земјите од Западен Балкан.
– Ако нема датум, тогаш тоа често значи дека темпото се забавува, рече Курц во изјавата за новинарите пред денешниот Самит ЕУ-Западен Балкан.
Тој оцени дека е позитивно што се одржува Самитот ЕУ-Западен Балкан и дека постои заложба на Унијата за проширување, а на прашањето за шпекулациите дека францускиот претседател Емануел Макрон нема да ја смени својата цврста позиција за проширување на ЕУ пред претседателските избори, Курц рече дека таквиот пристап го смета за погрешен.
Курц изрази задоволство што повторно се одржува директна средба со претставниците на земјите од Западен Балкан, потсетувајќи дека последниот таков состанок беше во 2018 година, пред пандемијата.
Хрватска го поддржува процесот на проширување на Европската унија кон соседните земји, изјави премиерот на земјата Андреј Пленковиќ во Словенија и предупреди дека без јасна порака до Југоисточна Европа за нејзината европска перспектива, се отвора простор за други глобални сили во тоа област.
– Позицијата на Хрватска е многу јасна. Ја поддржуваме европската перспектива, процесот на проширување на ЕУ во нашите соседни земји. Ние веруваме дека ова е исклучително важно и оти треба силно да ја испратиме оваа порака, изјави Пленковиќ пред неформалната работна вечера со колегите од ЕУ.
Како што јави Хина, тој додаде дека декларацијата ќе содржи термини како што се европска перспектива и процес на проширување, но рече дека „не е реално да се очекува“ дека ќе се наведе и временската рамка за влез на тие земји во ЕУ.
Словенечкото претседателство со Советот на ЕУ предложи во декларацијата да се наведе дека ЕУ треба да биде подготвена да ги прифати сите земји од Западен Балкан најдоцна до 2030 година.
– На тоа се противат пред сè земјите од Западна Европа, но добро е да се постави прашањето за временската рамка, рече Пленковиќ
Бугарија потврди дека не ја променила својата позиција и дека нема да ја одобри преговарачката рамка за членство на Северна Македонија во ЕУ, јавува софиското издание „Медиапул“ во пресрет на Самитот ЕУ-Западен Балкан .
Како што јави дописникот на МИА од Софија, сепак, според изданието, шатл дипломатијата ќе продолжи и за време на форумот во Словенија.
Во пресрет на Самитот, бугарската потпретседателка Илијана Јотова за БНР изјави дека нема причина да се промени позицијата на Софија за Северна Македонија и покрај „сериозниот притисок на кој Бугарија ќе биде подложена од нејзините европски партнери“. Таа е категорична дека за неа најважно е „да се почитува правата на граѓаните во Република Северна Македонија со бугарско национално чувство.