Зоран Иванов
На врвот на ДПМНЕ кому како карактерна легитимација му припаѓаат неколкуте атрибути од насловот на овој текст, како кец на десетка му дојде изјавата на оној анонимус Георг Георгиев, актуелен министер на новата климава бугарска влада и еден од веќе дваесеттината тамошни министри за надворешни кои на темата Македонија и ЕУ што предизборно, што постзборно си ги испочешлаа партиските јазици за поен, два плус на тамошната бугарска изборна сцена.
Бугаринот изјави дека уставните не биле единствениот услов за Нашата да ги почне ЕУ преговорите па во некој негов интервју контекст, покрај уставните, условно ги спомна и протоколите и комисиите.
Протоколите и комисиите, таа стара и веќе кородирана јадица на која пак се закачија медиумите, а на која владта предводена од ДПМНЕ, во духот она нејзино и извтвено „ви рековме”, пропагандистички воскликнува со истите свои манипулации на темите истории и идентитети.
И пак истата партиско медиумска финта па еве, и со оваа најнова анти ЕУ тирада без повод, идентично како и предизборно лани, пак и пак со популистичка магла.
Магла партиски и магла медиумска за некаков загрозен идентитет.
Истата гачка што годиниве минати ја изнаслушавме а, притоа, ниту идентитет изгубивме ниту бутур.
Ниту пак е тоа можно. Ниту е можно да се преродат историски факти кои се замрзнати во времето на нивните случувања и кои се депонирани во нашите и во светските архиви.
Ниту пак идентитет може македонски да се загрози и загуби покрај милијардите редови македонски слова распослани по македонските учебници и литературни дела вгнездени во институтите, училиштата, универзитетите, библиотеките, катедрите, ректоратите.
Затоа, ајде доста со лагите историски и идентитетски.
Ако сте фраери, барем малку ако сте како што од актуелните позиции се перчите, ќе влезете во битки.
Ќе го изгласате уставниот услов за отворање на ЕУ кластерите, ќе ја поттурнете Македонија во која, нели, се колнете и ќе ги почнете преговорите.
Вака, со тоа отрцаното „ви рековме“, само бегате кукавички и не’ предавате без битка.
Без битка.
Си најдовте нова рачка во изјавата на оној несреќник случаен министер во климавата бугарска влада за да продолжите со провидната партиска агенда на лажна гордост на најбедната европска држава. И си најдовте нова рачка и натаму да ја туркате земјава во изолација во намерата да си владеете без европски надзор.
А многу е едноставно.
Со Бугарија конечно треба да се се судриме на европскиот терен. Без тој чин сето друго е манипулирање со чувствата на граѓаните.
Треба да се влезе во битка, брзо да се случат уставните, брзо да се почне со ЕУ преговорите, да почнат отворањата на поглавјата со тоа и на реформите и да се престане со претпоставките дека на евро патот Бугарија ќе продолжела да не’ уценува со некакви неевропски дребулии како истории и идентитети.
Значи, баталете претпоставките за тоа што тоа ќе правела Бугарија. Темата е што ќе правиме ние. Ќе влетаме во ЕУ битка или кукавички и манипулативно и натаму ќе стоиме настрана од ЕУ.
Но ајде, еве, ако Бугарија навистина, дури и пред очите на сите други ЕУ членки останува на најавите за некакви нејзини историски и идентитетски хирови, нам, на Македонија, ни остануваат две силни алатки да ги отфикариме тие и таквите бугарски небулози и тоа заедно со се некои евентуални нивни потпомагачи.
Првата, да ги замрзнеме ЕУ преговорите и, втората, да ги напуштиме ЕУ преговорите.
Ете, просто.
Затоа, ДПМНЕ, доста со блефирања и ајде, ако сте мажи, истрчајте на ЕУ теренот зашто само плашливци само манипуланти и само политички популисти бегаат од битки.
Само таквите.