Министерството за образование и наука и Министерството за труд и социјална политика кои се потписници на Правилникот со кој е одлучено, олеснување со плаќање на партиципација да имаат само оние деца чиј еден родител е починат или му е одземено родителското право велат дека засега не постои можност да се измени овој Правилник, затоа што ќе треба да се менува и Законот за семејства.
Заработувам 300 евра месечно, а школарината за двете деца кои одат на факултет е 400 евра. Алиментација не сум добила 11 години, а немам никаква друга помош од државата. Ова за НОВА ТВ го раскажa самохрана мајка која по вчерашната сторија за дискриминацијата на самохраните родители ја контактираше нашата редакција.
Таа вели ја фрустрира дискриминацијата на самохраните родители и поделбата околу прашањето за партиципациите кои се плаќаат при упис на факултет.
„Не може да бидат ослободени само децата на самохраните родители кои го изгубиле сопружникот или другиот родител го изгубил родителското право. Сите деца кои се деца на самохрани родители треба да имаат некакво олеснување, особено оние кои не добиваат алиментација. Јас имам два сина едниот студент на ФИНКИ и едниот се надевам од октомври студент на Медицина. Како самохран родител со една плата од 18.000 денари како да ја платам партиципацијата од 200 евра за првиот семестар за едниот син и партиципацијата исто од 200 евра за другиот син. Поголемиот син кога се запиша на факултет беше во државната квота која е 200 евра годишно меѓутоа децата ги бутаа на испити за да запишат квадрат и автоматски да ги префрлат во приватна квота која е 400 евра“, вели мајката.
Таа додава дека не станува збор за правото на исплата или пак поведување на кривична постапка за да се добие алиментацијата од родителот кој не сака да плаќа.
„Многу самохрани родители не сакаат да поведат кривични постапки за да си го остварат правото на алиментација. Сите си имаат свои причини. Некогаш тоа се финансиските моменти, некогаш се други работи за кои и не сакаат да зборуваат а особено жртвите на семејно насилство без разлика дали е физичко или психичко затоа што не постојат пари на овој свет со кои може да се плати нивниот мир и мирот и спокојот на нивните деца“, смета читателката.
Таа вели дека многу од самохраните родители не можат ни да си ги прехранат децата а камо ли да плаќаат толкави суми за факултет. А каде се книги, пријавување на испити, дополнителни трошоци околу студирањето.
„Сепак и самохраните родители а и нивните деца се ранлива категорија во ова општество и редно е институциите веќе да се сетат и на нас“, вели нашата читателка.
НОВА ТВ вчера контактираше со Министерствата за образование и наука и Министерството за труд и социјална политика кои се потписници на Правилникот со кој е одлучено, олеснување со плаќање на партиципација да имаат само оние деца чиј еден родител е починат или му е одземено родителското право. Од двете министерства ни одговорија дека засега не постои можност да се измени овој Правилник, затоа што ќе треба да се менува и Законот за семејства.
Реакции за дискриминацијата на самохраните родители имаше и од „Хелсиншкиот комитет за човекови права“ и од здружението за самохрани родители „Една може“.
Од Хелсиншкиот комитет најавија дека ќе испратат дописи до министерствата и ќе побараат да се запре дискриминацијата на самохраните родители.
НОВА ТВ ги охрабрува сите родители кои се соочуваат со ваков проблем да ни пишат на нашата имејл адреса или во приватна порака на нашиот профил на социјалната мрежа „Фејсбук“.