Published: Monday, May 6, 2019 14:32
Кривичниот совет при Основниот суд го укина куќниот притвор на Сашо Мијалков и му определи мерки на претпазливост.
Мијалков еднаш неделно ќе треба да се јавува во Судот, одземена му е патната исправа и забрана за преминување на државната граница со лична карта.
Од Кривичниот суд информираат дека решението е донесено по одлуката на Апелација да му се укине куќниот притвор на Мијалков.
Мијалков беше во притвор во Шутка, по изрекувањето на пресудата за „Титаник 2“ за изборни нерегуларности за што доби 3 години затвор. Со решение на Апелациониот суд решението на првостепениот суд е преиначено и на Мијалков му беше определна мерка куќен притвор кој трае до правосилноста на пресудата, а најдолго 60 дена.
Со оглед да рокот од 60 дена истекува на 06.05.2019 година, советот постапувајќи по службена должност утврди дека мерката куќен притвор треба да се укине, соопштија од Кривичниот суд.
„Согласно член 481 ст.4 од ЗКП, кога судот ќе изрече во пресудата казна затвор, може да определи обвинетиот да се стави во притвор , односно да остане во притвор, ако постојат причините од член 165 ст. 1 т. 1,2 и 3. Притворот во таков случај може да трае до правосилноста на пресудата, но најдолго до 60 дена“ соопштуваат од Судот.
Претходно на Мијалков му беше укинат и куќниот притвор за „Империја“.