Саудиска Арабија денеска погуби 81 лице осудени за злосторства кои се движат од убиства – до припадност на милитантни групи, најголема масовна егзекуција извршена во кралството во неговата модерна историја.
Меѓу погубените има 73 Саудијци, седум Јеменци и еден Сириец. Во извештајот не е наведено каде се извршени егзекуциите.
Државната саудиска прес-агенција ги објави денешните егзекуции, велејќи дека меѓу погубените има и “осудени за различни злосторства, вклучително и убиства на невини мажи, жени и деца“.
Кралството, исто така, соопшти дека некои од погубените биле членови на Ал Каеда, групата Исламска држава и поддржувачи на јеменските бунтовници Хути. Коалицијата предводена од Саудиска Арабија се бори со Хутите поддржани од Иран од 2015 година во соседен Јемен во обид да ја врати меѓународно признатата влада на власт.
“Обвинетите добија право на адвокат и им беа гарантирани нивните целосни права според саудискиот закон за време на судскиот процес, кој ги прогласи за виновни за извршување на повеќе грозоморни злосторства во кои загинаа голем број цивили и службеници за спроведување на законот“, соопшти Агенцијата за печат на Саудиска Арабија.
Не е наведено како биле егзекутирани затворениците, иако осудените на смрт обично се обезглавуваат во Саудиска Арабија.
Во соопштението на саудиската државна телевизија се опишани погубените дека „ги следеле стапките на сатаната“ во извршувањето на нивните злосторства.
Егзекуциите предизвикаа силна меѓународна осуда. “Светот треба да знае дека кога Мохамед бин Салман ќе вети реформи, сигурно ќе следи крвопролевање“, рече Сораја Баувенс, заменик-директор на Reprieve, група за застапување со седиште во Лондон.
Се претпоставува деа кралството ја избра саботата за егзекуциите бидејќи поголем дел од светското внимание е фокусирано на руската војна против Украина – а САД се преокупирани со обидот да ги намалат рекордно високите цени на бензинот.
Бројот на случаи на смртна казна што се извршуваат во Саудиска Арабија се намали за време на пандемијата на коронавирус, иако кралството продолжи да ги обезглавува осудениците, под лидерство на кралот Салман и неговиот син, престолонаследникот Мохамед бин Салман.