Христијан Мицкоски денеска случајно или не призна дека оставката на членот на Комисијата за историски и за образовни прашања помеѓу Македонија и Бугарија, Ванчо Ѓорѓиев, е негово дело и по негова инструкција, соопштија од СДСМ.
– Со повикот до останатите членови на Комисијата и тие да си дадат оставка, Мицкоски се обидува по којзнае кој пат да ги поткопа позициите на државата и да ги влоши односите со Република Бугарија. И Комисијата и владата ги демантираа лажните вести на Ѓорѓиев за наводни притисоци врз работата, но тоа не го спречува Мицкоски во неговите деструкции. Одамна е прочитано ваквото неодговорно, антинародно и антидржавно однесување на Мицкоски, затоа повторно ќе биде казнет од граѓаните, се наведува во соопштението на СДСМ.
По оставката на на членот на Комисијата за историски и образовни прашања меѓу Македонија и Бугарија, Ванчо Ѓорѓиев, лидерот на ВМРО-ДПМНЕ, Христијан Мицкоски ги повика и останатите членови на Комисијата да си поднесат оставки. Тој на нив им пренесе порака „да внимаваат што преговараат и потпишуваат“.
– Го прочитав соопштението и можам да кажам дека сум шокиран. Ако е вистина тоа дека некој помеѓу двата изборни круга одлучува да распродава дел од македонскиот идентитет и да ја продава Македонија за да опстане политички, јас сум шокиран и повикувам веднаш, не само до тие политичари кои што вршат притисок туку и до останатите членови на Комисијата која што преговара, да ја следат постапката на професорот Ванчо Ѓорѓиев. Затоа што треба да се свесни дека слугувањето на тие коишто ја продаваат Македонија ќе биде запишано во историјата, ама на темната страна, изјави Мицкоски.