СДСМ ги поддржува родителите кои поднесоа кривични пријави против директорите на училиштата во Прилеп кои ги тераа учениците да одат на протестите на „За заедничка Македонија“.
Во соопштението на партијата пишува дека поднесени се кривични пријави против директорот на прилепската гимназија „Мирче Ацев“, Киро Николоски и против Жарко Темелкоски, директор на средното индустриско училиште „Ристе Ристески – Ричко“.
„Никој нема право да принудува деца да бојкотираат настава за да одат на националистички протести на кои се шири етничка омраза. Ниту пак е дозволиво да не ги заштити децата, независно дали се работи за раководство на училишта, на општини или надлежни органи што имаат должност да реагираат. Надлежните институции мора да постапат против секој во училиштата или задолжен за нив, кој ја злоупотребува својата функција или позиција за овие цели и на тој начин ја загрозува и безбедноста на децата“, пишува во соопштението на партијата.
Од СДСМ апелираат „ВМРО-ДПМНЕ ја прифати реалноста дека е во опозиција и да престане со лаги да ги вознемирува граѓаните“.