Откако на социјалните мрежи почна да се споделува списокот на должници на Радиодифузна такса кој денеска го објави УЈП, а во којшто како должник се јавува и поранешниот директор на тајната полиција и член на врвот од владејачката партија, Сашо Мијалков, опозициската партија СДСМ го искористи овој момент да  уште еднаш да ги повтори своите предизборни ветувања.

Мијалков да биде спокоен. По 11 декември радиодифузната такса нема повеќе да биде трошок за неговиот домашен буџет и неговото име нема да фигурира на должнички списоци за радиодифузна такса. Ако оваа давачка е товар за бизнисменот Мијалков, тогаш убедени сме дека посиромашните семејства ќе бидат уште позадоволни од оваа мерка, се вели во писменто соопштение од партијата испратено денеска попладне.

СДСМ во истото соопштение го поставува и прашањето за можна селективна правда во третманот на граѓаните од страна на УЈП.

Ги прашуваме одговорните во УЈП: Дали веќе е испратено решение за присилна наплата на адресата на Мијалков? Дали и во случајот на Мијалков ќе се постапи со блокирање на сметка и испраќање на извршители, како што е пракса со останатите должници?, прашува СДСМ.

Денеска УЈП објави список со должници на Радиодифузна такса. Покрај Мијалков, на црната должничка листа се наоѓаат уште 85,000 граѓани на кои  им се заканува блокирање на сметките и присилна наплата.