Христијан Мицкоски потврди дека го интересира само власт, по секоја цена, и дека не станува збор за никаква политичка идеја, нема никакви вредности, нема платформа, се вели во соопштението на СДСМ како реакција на денешната прес-конференција на лидерот на ВМРО-ДПМНЕ кој повтори дека има парламентно мнозинство и дека ќе се обиде да формира, како што нагласи, влада со полна ефикасност или во спротивно ќе бара организирање на брзи предвремени избори.
Народот денеска слушна од Мицкоски дека целта му била да руши Влада со политичка партија која е дел од актуелната влада – БЕСА, дека земјата ќе ја носел напред ама со анти-НАТО и анти-американски коалиционен партнер – Левица. На наредниот состанок на масата на новата коалиција останува да ги стави фотографиите од Орце Камчев, Никола Груевски и Сашо Мијалков и да изјави дека заедно ќе го расчистуваат криминалот на ВМРО-ДПМНЕ, нагласуваат од владеачката партија.
Не може, како што се вели во дописот на СДСМ, „тие што ги кочеа сите прогресивни процеси, интерграцијата во НАТО и ЕУ, порастот на платите, да бидат опција за иднината.
Конфликтот на принципи, конфликт на ставови, конфликт на политики и конфликтот на вредности на сите овие политички субјекти кои ги споменува Мицкоски не може да испорача ништо за интересот на граѓаните, ниту пак за националните интереси на државата. Ќе видиме деновиве дали ќе се избере нова анти-демократска, анти-Преспа, анти-НАТО и анти-ЕУ Влада, дали Мицкоски има капацитет и одговорност, истакнуваат социјалдемократите.
Социјалдемократскиот сојуз на Македонија порачува дека е на страна на граѓаните, на страна на националниот интерес и напредокот на државата и уште еднаш упати апел за соработка и одговорно застанување на страната на демократската опција до сите прогресивни демократски сили и сите пратеници кои се за европска иднина на нашата држава, за правда и економскиот напредок.