По поднесувањето оставки на министрите и замениците министри на СДСМ, следува нивен нов потег – доколку не се исполнети условите за избори на 5 јуни, СДСМ не оди на избори, изјавуваат за НОВА извори од оваа опозициска партија.
Кредибилноста на изборите зависи од пречистени избирачки списоци, одвојување на државата од партијата и медиумски реформи, додава изворот за НОВА. Сите овие предуслови се неопходни за фер и демократски услови, а во моментов сите очи се вперени во ДИК и нивната оценка во кој степен се пречистени списоците и дали постојат услови за одржување на избори на 5 јуни.
Што е однесува до медиумските реформи, Законот за медиуми беше отфрлен во Парламентот, односно предлогот на белгискиот посредник Питер Ванхауте, кој беше поддржан од СДСМ. Одвојувањето на државата од партијата воопшто не е започнато и очекувањата да се стави крај на ваквиот тип на владеење до 5 јуни се нереални.
Претседателот на Парламентот, Трајко Вељаноски, во телевизиско интервју пред два дена најави можност распишувањето и оддржувањето на изборите на петти јуни, да се одложи до 15 април, наместо на 7 април:
– Како претседател на Собранието на Република Македонија, условно, можам да тактизирам наместо на седми април до петнаесети април да го потпишам решението за распишување и оддржување на изборите на петти јуни, за да и дадам можност на ДИК за продолжување, условно, на некои работи доколку евентуално не се завршени.
Тоа се однесува околу делот на Избирачкиот список, бидејќи многу активности во ДИК за време на спроведувањето на изборите зависат од денот на потпишување на решението за распишување на избори од страна на претседателот на Собранието. Поради тоа јас по распуштањето на Собранието ќе разговарам со претседателот на ДИК и ќе му ја дадам таа опција за да може да имаат уште повеќе време за да ги дозавршат работите што би требало, рече Вељаноски.
Со ова практично, би се одложил целиот процес за една недела, во која надлежните институции треба конечно да се изјаснат дали целосно се исполнети условите за 5 јуни- доколку објават негативен одговор, опозициската СДСМ би ја потврдила својата одлука за бојкот на изборите во услови кога тие не би можело да се очекува да бидат фер и демократски.