СДСМ смета дека засега нема потреба од организирање лидерска средба. Во овој момент, според партијата, најважно е надминувањето на пандемијата со ковид-19 и решавање на економските последици од неа, истакна потпретседателот на партијата, Коста Петров на денешната прес-конференција.
„Сметаме дека не е време да се разговара за избори. Има време и ќе разговараме за тоа. Наш главен фокус останува здравјето на нашите граѓани и економските мерки со цел да зачуваме повеќе работни места, да помогнеме на поголем број граѓани и да ја победиме оваа криза од коронавирусот“, рече Петров.
Лидерот на ВМРО-ДПМНЕ, Христијан Мицкоски синоќа јавно го повика шефот на државата, Стево Пендаровски да свика лидерска средба во врска со иницијативата на СДСМ и коалициските партнери кои бараат повторното свикување на Собранието. Од Кабинетот на претседателот Пендаровски потврдија дека се планира организирање лидерска средба во првата половина на мај, а ќе се разговара за натамошниот тек на политичкиот процес во земјата, како и за можните термини за одржување на следните парламентарни избори.