Опозициската СДСМ денеска преку соопштение најави дека новата влада ќе го гасифицира Скопје и дека некој ќе сноси последици за загадувањето. Од СДСМ велат дека крајно неодговорно е клиниките да се преполни со болни деца и граѓани, а на градоначалничкиот состанок да не се донесе ниту една ефективна мерка против загадувањето во Скопје.
„Граѓаните знаат дека Скопје можеше да биде гасифициран град. БЕГ (Топлификација) под контрола на лица од фамилијата на Никола Груевски можеше да ги мотивира граѓаните да се греат на парно, наместо да ги принудува да се исклучуваат поради лошите услуги. Груевски и Коце Трајановски можеа да овозможат субвенции за пелети на граѓаните, наместо да потрошат над 630 милиони евра за криминалниот проект Скопје 2014. Тоа што 10 години не го направија Никола Груевски и Коце Трајановски, ќе го спроведе новата одговорна Влада на граѓаните на Република Македонија. Новата Влада ќе ги гасифицира и Скопје и сите други градови во Македонија, по успешните примери во Струмица и Куманово“, пишува во соопштението на СДСМ.
Инаку вчера градоначалниците од Скопје одржаа заеднички состанок на кој разговараа за мерките кои треба да се воведат за да се намали загадувањето, но не договорија ништо конкретно.
Градоначалникот Трајановски најави дека очекува по формирањето на владата, веднаш да се објави тендер за гасификација на Скопје.
„Со формирањето на новата Влада очекуваме итно да се објави тендерот за гасификација на Скопје. Од микро мерките кои секојдневно ги спроведуваме ќе споменам дека ќе ги интензивираме контролите кај инсталациите кои подлежат на Б- интегрираните дозволи, а општините ќе ги контролираат помалите капацитети кои подлежат на Елаборатите за заштита на животната средина. Продолжуваме и со прскање на градските сообраќајници со средството калциум магнезиум ацетат, за контрола на ситната прашина“, рече Трајановски.
И додека надлежните остваруваат средби, полемизираат па даваат пораки и слично, експертите од оваа област неодамна на отворена трибина, зборувајќи на истата тема, објавија дека Македонија е петта во Европа по загаденост на воздухот.
Во Македонија на годишно ниво има 900 до 1.000 смртни случаи кои се поврзуваат со квалитетот на воздухот кој го вдишуваат, а во пораст се и малигните заболувања.
За в среда најавен е протест на граѓани и активисти организирани преку социјалните мрежи кои на бесплатен огрев за граѓаните кои се греат на гуми како и привремена забрана за работа на сите на бесплатен огрев за граѓаните кои се греат на гуми како и привремена забрана за работа на сите индустриските капацитети.
Протестот ќе се одржи во 17 часот во Градски парк.