СДСМ реагира по денешното изгласување на измените на Законот за Влада, со кои по следните парламентарни избори ќе биде укината техничката влада, оценувајќи дека со тоа „паднала последната брана на демократијата“.
Од партијата соопштија дека техничката влада од 2016 година претставувала единствен механизам за заштита од, како што наведуваат, целосна узурпација на институциите и минимална гаранција за фер изборни услови.
Со овој потег, Мицкоски и ВМРО-ОКГ ја отстранија и последната брана која спречуваше целосна контрола врз изборниот процес. Македонија капитулира пред криминалот и корупцијата, наведуваат од СДСМ.
Од опозициската партија оценуваат дека укинувањето на техничката влада покажува намера на власта да владее без контрола, транспарентност и одговорност.
СДСМ порача дека ќе продолжи, како што наведува, да се бори за вистинска демократија и европска иднина на Македонија.