Наќе Чулев е новиот предлог на ВМРО ДМПНЕ за министер за внатрешни работи (МВР) во техничката Влада што треба да биде изгласана до утре на полноќ со задача да ги организира предвремените парламентарни избори на 12 април.
Овој кандидат на опозицијата е прифатлив и за владејачката СДСМ за разлика од претходниот (Драган Ковачки) чие именување се косеше со член 97 од Уставот кој пропишува дека „лице кое раководи со МВР или со Министерството за одбрана треба да биде цивилно лице најмалку три години пред изборот на таа функција“.
Според СДСМ, Чулев не е униформирано лице и против него нема покренато обвиненија, со што се исполнети уставните критериуми.
„Со овој предлог на ВМРО-ДПМНЕ не се крши Уставот. Не станува збор за воено или униформирано лице и не е под обвинение. Со тоа се исполнети условите предлогот да оди на гласање во Собранието заедно со целата преодна влада која треба да ги спроведе изборите на 12 април, соопшти СДСМ.
Чулев беше директор на Агенцијата за разузнавање за време на претседателот Ѓорге Иванов. Мандатот му истече во 2017 година, а потоа продолжи да биде дел од професионалниот состав на агенцијата.
Министерството за внатрешни работи беше последното отворено прашање меѓу власта и опозицијата за техничката Влада. Преостанатите четири позиции се прифатливи за СДСМ и ќе бидат пополнети со Рашела Мизрахи за министерка за труд и социјална политика, Невенка Стаменковска за заменик министерка за информатичко општество, Гордана Димитровска за заменик министерка за финансии и Цветан Трипуновски за заменик министер за земјоделство, шумарство и водостопанство (МЗШВ).