Пратеничката од СДСМ Јагода Шахпаска денеска упати апел до сите пратеници во Собранието да ги поддржат законски измени предложени од парламентарното мнозинство предводено од СДСМ што, како што рече на прес-конференција, носат придобивка за сите граѓани.
Со законите кои се во собраниска процедура, како што наведе ќе се овозможи работниците со ниски примања да можат да користат субвенции за бесплатно летување, а пензионерите да добиваат зголемување и усогласување на пензиите согласно зголемувањето на платите во државата и согласно порастот на трошоците на живот. Вработените во текстилната, кожарската и индустријата за обувки ќе добиваат 12.000 денари плата, над 3.000 стечајци ќе добиваат 7.569 денари месечно и се укинува и радиодифузната такса.
– Сето ова е веќе преточено во закони кои се во собраниска процедура, што парламентарното мнозинство предводено од СДСМ ќе ги усвои во претстојниот период, рече Шахпаска, потенцирајќи и дека воведувањето на дневната тарифа на евтина струја е веќе во процедура.
Една од десетте пратнички групи на ВМРО ДПМНЕ реагираше на прес конферецијата на колешката Шахпаска, во која се наведува дека парламентарно мнозинство предводено од СДСМ го користи Собранието на Република Македонија единствено за политички маркетинг во пресрет на локалните избори, а не за решавање на реалните проблеми на граѓаните.
-Единствени проекти и мерки на СДСМ, Зоран Заев и парламентарното мнозинство во изминатиот период се партиски вработувања, набавка на цвеќиња по министерски кабинети, набавка на апетисани и службени патувања низ светот.
Доколку владата на СДСМ и нивното парламентарно мнозинство навистина се грижеше за унапредување на квалитетот на животот на граѓаните, ќе ги прифатеше предлог-законите кои ВМРО-ДПМНЕ ги поднесе, како и амандманите кои што произлегуваат како барање на граѓаните, а не истите едногласно да ги одбие, се вели во реакцијата.
Од ВМРО ДПНЕ велат дека ако СДСМ навистина се грижеа за вработените, ќе им обезбедеа минимална плата од 16 000 денари, онака како што ветуваа пред изборите.