„Телефонските броеви секако се јавни и достапни на сите граѓани. Но, ова е дел од црните сценарија на оние кои не и мислат добро на земјата и ова го користат единствено како гола борба за власт и спасување од криминал“, велат од пратеничката група на СДСМ.
Координаторот Јован Митрески додава дека меѓу пратеничката група владее увереност дека граѓаните нема да подлегнат на шпекулациите и лагите, затоа што, вели тој, заклучоците што ќе ги предложиме и гласаме гарантираат продолжување на европскиот пат со безусловно почитување на македонскиот јазик и безусловно почитување на идентитетските, историските и културните особености на македонскиот народ.
Нервозата пред утрешната седница денес ја достигна својата кулминација кога телефонски броеви на пратениците од владејачката коалиција се најдоа на „огласната табла“ на социјалната мрежа Твитер придружени со повик до граѓаните: „Порачајте им да не го предаваат македонскиот народ“.
Ваквата објава предизвика вознемиреност и различни прогнози околу утрешниот ден на кој пратениците треба да се изјаснат за таканаречениот француски предлог со кој треба да се тргне бугарското вето за почеток на преговорите со ЕУ.
Од скопското обвинителство велат дека ги следат информациите и доколку бидат утврдени елементи на кривично дело ќе се постапи согласно законските надлежности.
Во објавата на Твитер се обелоденети телефонските броеви на сите пратеници од СДСМ, Демократската партија на Турците, ВМРО-Народна партија, НСДП, и еден „независен“ пратеник.
На листата, иако се дел од владината коалиција, ги нема телефонските броеви на пратениците од ЛДП, Демократска обнова на Македонија (ДОМ) и Демократски сојуз кои деновиве јавно изразија несогласување со делови на францускиот предлог и доставија предлог-заклучоци за негово дополнување до Собранието. (Р.Н.)