Претстојниот „Роџерс куп“ без вториот светски рекет. Швајцарецот Роџер Федерер го откажа учеството на тенискиот турнир од Мастерс серијата 1000 на канадска почва со цел да заштеди енергија пред најважните турнири во сезоната.
„Со оглед дека распоредот за играње на турнири е клучен за мојата долговечност, морам да го откажам настапот во Торонто оваа година. Разочаран сум што нема да учествувам на Роџерс купот. Фантастично се чувствував лани во Монтреал и секогаш уживав во мечевите пред канадска публика. Но, за жал, принуден сум да го прескокнам турнирот ова лето“, истакна Федерер кој го освојуваше пехарот во 2004 година и во 2006 година.
Швајцарскиот тенисер во 2018 година ја пропушти комплетната сезона на земјена подлога. Последниот настап го имаше на Вимблдон на кој беше елиминиран во четврт-финалето од Јужноафриканецот Кевин Андерсон.
Годинашното издание на „Роџерс куп“ е закажано од 6 до 12 август. Турнирот е со награден фонд од 5.315,025 милиони долари. Актуелен шампион е Александар Зверев кој во ланското финале, токму против Федерер, славеше со 6:3, 6:4.