Глен Ходл, легендарниот англиски фудбалер, репрезентативец и селектор, доживеа срцев удар за време на гостување во ТВ емисија. Тој, според извештаи на островските медиуми, одеднаш се фатил за срце и се урнал на под во студио. Камерите, пишуваат тие, за среќа во моментот не биле насочени кон него со што е избегнато вознемирување на јавноста. Со експресна реакција на персоналот и итната медицинската помош, тој веднаш бил превезен во болница и неговата состојба засега е стабилна.
Ходл е поранешен играч на Тотенхем, на Монако, на Челзи кој настапи во 53 средби и за репрезентацијата на Англија и постигна осум гола. По завршување на фудбалската кариера се впушти во менаџерски води и беше на кормилото на Свиндон, на Челзи, на Тотенхем, на Саутемптон и на Вулверхемптон. На клупата на „Гордиот Албион“ седеше од 1996 година до 1999 година.