Вчера објави дека има нов тренер, денеска со објава за нов спонзор. По договорот за соработка со Андре Агаси, српскиот тенисер Новак Ѓоковиќ официјализира соработка и со познатиот производител на спортска опрема „Лакост“.
„Чест ми е што сум дел од „Лакост“, бренд кој стои зад најголемите тениски турнири“, изјави Ѓоковиќ за време на промоцијата.
Во изминатите три години Ѓоковиќ настапуваше во опрема на „Уникло“, а во производи на францускиот бренд за првпат ќе се појави на претстојниот Ролан Гарос во Париз каде ќе ја брани титулата. Финансиски детаљи од договорот не се познати, ниту времето на кое се однесува. Она што е познато е дека од Јапонците досега добиваше девет милиони долари на годишно ниво.
Компанијата „Лакост“ е основана во далечната 1933 година од тенисерите Рене Лакост, кого медиумите го нарекуваа алигатор, и Андреа Жие. Покрај гардероба, произведува и обувки и парфеми.
Ѓоковиќ, претходно во кариерата, играше и во опрема на „Серџо Такини“ и на „Адидас“.