Во Македонија во последните десетина години во континуитет постои намалување на вкупниот број новорегистрирани случаи на туберкулоза. Ваквиот пад ја води Македонија кон земји со ниска стапка на инциденца на туберкулоза. изјави денеска Билјана Илиевска Попоска, претседател на Здружението на пневмофтизиолозите на Македонија, по повод Светскиот ден на туберкулозата – 24 Март.
Според неа, туберкулозата се уште е болест на младата популација, а мажите почесто заболуваат од туберколоза за разлика од жените.
– Во Македонија исто така намалена е и смртноста од туберкулоза. Во 2017 регистрирани се седум смртни случаи од туберкулоза што е значително помалку во однос на 2016 година кога беа регистрирани 21 смтен случај од болеста, рече Илиевска Попоска.
Истакна дека минатата година се бележи значително намалување во однос на детската туберкулоза, односно појава на болеста кај деца од нула до 14 години.
Во Македонија ризични популации за појава на болеста се затворениците, како и лицата кои престојуваат во психијатриските установи, бидејки тоа се затворени колективи каде што инфекцијата може лесно да се прошири.Минатата година во затворите се регистрирани десет нови случаи со тбц, а во психијатриските болници седум нови случаи.
– Постои Национална стратегија за борба против тбц за 2018-2022, каде се вметнати сите активности кои се потребни за туберкулозата да го задржи овој позитивен тренд на намалување и во наредните години да се вброиме во земји со ниска инциденца на болеста, додаде Попоска.
Директорот на ЈЗУ Институтот за белодробни заболувања и туберкулоза Предраг Божичковиќ, рече дека во последните десет години со напорите на лекарите и професорите од Институтот, за една третина се намалени случаите на заболени од туберкулоза.
На Светскиот ден на туберкулозата 24 Март се организираат собири се даваат совети и информации до широката јавност, со цел да се проговори за појавата на туберкулозата на глобално ниво, којашто се уште претставува епидемија од светски размери.
Мотото под кое Светската здравствена организација го одбележува Светскиот ден за борба против туберкулозата е „Потребни се лидери за крај на туберкулозата“.
СЗО до 2035 година има поставено цел за искоренување на туберкулозата на глобално ниво.