Се намалува процентот на имунизација на децата на ниво на државата. Родителите се плашат да ги вакцинираат своите деца и ја оддолжуваат вакцинацијата со што се намалува опфатот на имунизација.
-Бројката од 66% опфат никогаш досега не била олку ниска, според статистиката од нашите извештаи воглавно ова се однесува на централното градско подрачје. Апел родителите да ги донесат своите деца на вакцинирање, вели др Татјана БаевскаВучковиќ.
Загрижувачки низок процент има кај вакцинацијата против морбили рубеола и перотит (МРП вакцина), а со тоа се зголемува и ризикот од појава и ширење на овие заболувања. МРП вакцината стана синоним за страв кај некои родители кои сметаат дека вакцината е главниот виновник за порастот на аутистични деца, како резултат на антивакциналните интернет кампањи.
Според податоците од Институтот за јавно здравје од 2.800 деца на возраст од 13 месеци кои не ја примиле тројната вакцина како примовакцина, 2.400 се во Скопје.
Ниското ниво на имунизација се должи и на тоа што родителите меѓусебно се советуваат да ја одлагаат МРП вакцината се додека децата не наполнат три години.
Лекарите апелираат родителите навреме да ги вакцинираат децата за да спречат можна епидемија на заразни болести.
-Воопшто нема причина за одложување на вакцината, особено сега во овој период кога знаеме дека во западноевропските земји има големи епидемии на морбили, особено Романија каде има и смртни случаи, а и Бугарија каде имаше еден смртен случај, доволно е само еден случај да се појави во Македонија, морбилите се шират многу брзо веднаш може да добиеме епидемија на морбили, вели др Јованка Костовска, државен советник во Министерството за здравство и член на Комитетот за имунизација.
И фармацевтите со предупредувачки тонови за последиците од антивакциналните ампањи. Тие гарантираат дека МРП вакцината во Македонија е со докажан квалитет.
Според податоците на Комисијата за имунизација, пред воведувањето на МРП вакцината, годишно биле регистрирани по 10.000 случаи на морбили и 7.000 случаи на рубеола. Голем број од нив имале смртен исход. Лекарите предупредуваат дека атнтивакциналните кампањи може да ги вртат ваквите статистики.