Некогаш во него се возеле претседатели на држави и нивните сопруги. Секако со другарот Тито. Денес во овој „Мерцедес-бенз пулман 600 ландаулет“ може да се вози било кој, што за тоа задоволство ќе одвои 3 милиони евра.
Општо е познато дека Јосип Броз Тито сакал автомобили и дека имал голем број на ексклузивни примероци на разни типови, кои на Маршалот му служеле како превозно средство.
Можеби највпечатливите се бројни „Мерцедеси 600“, од кои најатрактивни биле кабриолетите, односно ландаулети, што е назив за модели кои само половично се покриени со платнен покрив.
Во сопственост на СФРЈ биле такви два примероци, од вкупно 59 произведени.
Куриозитет е што спаѓаат во многу ретка група од се на се девет било кога направени ландаулети со шест врати.
За жал, овој примерок е продаден уште далечната 1989 година.
Произведен е во 1971 година, а во период после смртта на Тито до моментот на продажба користен е на Бриони за превоз на многу важни гости од аеродромот до резиденциите.
Токму Бриони во најголема тајност го продаде овој примерок на „Мерцедес“ со сериски број 001854 на странски купувач и оттогаш промени повеќе сопственици, односно колекционери.
Наскоро би требало да добие нов сопственик. За продажбата се погрижи аукциската куќа „Том Хартли ЈНР“, а неофицијалната информација е дека почетната цена би била нешто помалку од три милиони евра.
Иначе, автомобилот има автоматски менувач и досега поминал 27.378 километри.