Алијансата за Албанците и СДСМ, односно работните групи од двете партии имаат средба во хотелот Александар Палас во Скопје на која се разгледуваат материјалите за нацрт-законот за употреба на албанскиот јазик. Средбата се уште е во тек.
Од Алијансата за Албанците изјавија дека на средбата ќе го претстават нивниот предлог-закон кој го подготвиле во соработка со правни експерти.
Претставници на СДСМ на оваа средба се Радмила Шеќеринска, Рената Дескоска и Оливер Спасовски, а од ДР-ДПА се Арбен Таравари, Агон Ферати и Елми Азири. Средбата е затворена за јавноста, односно на новинарските екипи не им е дозволено присуство во просторијата
Генералниот секретар на Алијансата на Албанците,Арбен Таравари вчеравечер на Телма изјави дека решение ќе биде најдено многу скоро, откако претходно ја најави средба со СДСМ. Тој уште нагласи дека Алијансата е за декриминализација, односно сите што се вмешани во криминал да одговараат пред законот, алудирајќи и на ДУИ.
СДСМ веќе неколку дена со ДУИ разменуваат ставови и мислења за предлог- закон за употребата на албанскиот јазик. Од партијата на Али Ахмети тврдат дека нивниот предлог е „апсолутно во согласност со Уставот“ и околу него нема компромиси. Од СДСМ не откриваат многу детали за преговорите со ДУИ, но стојат на ставот дека се мора да биде во согласност со Уставот.