Одделението на Државниот пазарен инспекторат од Куманово ќе биде затворено, бидејќи еден од инспекторите е позитивен на ковид-19, соопшти денеска директорот на Државниот пазарен инспекторат, Стојко Пауновски.
„Денес ќе мора да го затвориме целокупното одделение во Куманово бидејќи еден од инспекторите е позитивен на ковид-19. Правиме се што е до нас за заштита на инспекторите, но и оние кои правилно ги почитуваат мерките, уредбите и протоколите од Владата бидејќи тоа е во интерес на сите“, рече Пауновски.
Тој апелираше до сите граѓани, особено до водачите на политичките партии и на верските заедници, да бидат одговорни.
„Мора да постапуваме неселективно за да бидеме успешни. Потребна ни е помош од сите граѓани и од правните субјекти за да излеземе како победници на крај и да не бидеме единствени во регионот каде секојдневно има зголемување на ковид позитивни случаи“, рече Пауновски.