Министерот за надворешни работи Бујар Османи ќе прати официјална протестна нота до Бугарија поради последната изјава на европратеникот Ангел Џамбаски кој упати навреди на адреса на премиерот Димитар Ковачевски.
Османи вели дека реакцијата ќе биде на изјавата на европратеникот како говор на омраза, која според сите и меѓународни и билатерални договори што ги имаме со ЕУ е основа за да се реагира.
„Иако досега се обидувавме да го игнорираме, затоа што целта на европратеникот е да ги искористи тие реакции за себепромоција, овој пат ги надмина сите граници на провоцирање и тука мора да реагира и бугарската држава бидејќи тоа се веќе територијални претензии и навредлив говор кон народ и тоа нема да го премолчиме“, рече денеска шефот на дипломатијата Бујар Османи.
И министерската за надворешни работи на Словенија, Тања Фајон, на денешната прес-конференција со Османи го осуди однесувањето на бугарскиот европратеник Џамбаски.
„Министерот Османи ме извести и за овој немил настан на Џамбаски. Се надевам дека денеска ќе испрати дипломатска нота. Станува збор за навреда на граѓаните на Северна Македонија и јас бев сведок и ги осудував неговите активности, изјави и сите тие провокации во период кога државите обезбедуваат позитивна средина во вакви услови. Ги повикувам сите пријатели во Бугарија да се воздржат од несоодветни коментари кои внесуваат раздор, нерасположение и конфликти меѓу населението. Секоја провокативна, навредлива изјава бара реакција, министерот ја кажа реакцијата со вербална нота, јас тоа го поддржувам и во слична ситуација и јас би реагирала така“, изјави Фајон.
Во видеообраќање, пред карта на голема Бугарија, со делови на Албанија, Србија и цела Македонија во неа, Џамбаски изрече серија навреди кон премиерот Димитар Ковачевски, но и кон нашата држава. Тој го нарече македонскиот премиер „машка секретарка“ на средбите на бившите премиери Бојко Борисов и Зоран Заев, а за македонизмот рече дека е „антибугарска, нацистичка, фашистичка и болшевичка идеологија која има задача да ги искорени бугарската традиција, култура и историја во Македонија“, притоа оценувајќи дека се работи за „фалш идентитет кој е антибугарски“.