Даниел Сервер, во интервју за Гласот на Америка, вели дека Македонија, со долгата политичка криза, се довела на работ:
“Не мислам дека Македонија е пропадната држава, но се доведе себе си до работ, како многу пати до сега, но секогаш се извлекува во последен момент”, вели Даниел Сервер, директор на програмата за менаџмент на кофликт во Школата за напредни меѓународни студии на Џонс Хопкинс во Вашингтон.
Според него, Македонија треба да влезе во НАТО како ФИРОМ и да не се чека решавање на спорот со Грција бидејќи во таа област нема и наскоро нема да има напредок.
“Не верувам дека тука ќе има прогрес. Груевски не гледа компромис, кој тој би можел да го прифати. Грците не гледаат компромис, што тие би можеле да го прифатат. Сметам дека за Македонија би било добро да влезе во НАТО како ФИРОМ, што е особено важно за внатрешните односи во државата, бидејќи Албанците многу повеќе од Македонците го сакаат членството во НАТО“.
Сервер вели дека начинот на кој тоа може да се направи е „претседателот на САД да му каже на премиерот на Грција дека тоа треба да се направи. А тоа е многу тешко да се постигне. Знаете, во 2008-та бирократијата го убеди претседателот Буш да се обиде во тоа, и не успеа“.
Тој додава дека „ никој во бирократијата сега не сака да оди кај претседателот на САД и да бара од него да го направи тоа, бидејќи еднаш веќе пропадна. Но, сепак мислам дека би можело да успее доколку се примени вистински притисок. Грција навистина нема што да изгуби, бидејќи е широко прифатено во Македонија ова да биде решено пред членството во ЕУ“.
За Сервер е загрижувачки ако ова не се случи, поради тенденција меѓу Македонците во Македонија да се свртат кон Русија за поддршка, додека тенденција меѓу Албанците во Македонија е да се вртат кон САД за поддршка.
Според него, продолжувањето на проблемот ќе се одрази врз меѓуетничките односи внатре во Македонија, што е особено лошо за стабилноста на регионот.
Целото интервју прочитајте го тука.