Зголемување на безбедноста во сообраќајот и проекти за нови сообраќајници, бараат од Иницијативата „Шанса за Центар“. 

„Бараме најитно да се активира автоматскиот систем за следење и казнување во сообраќајот во Скопје, бараме решенијата за зголемување на безбедноста во сообраќајот да ги третираат најранливите и нивните потреби, а проектите за нови сообраќајници да ја имаат безбедноста како носечка компонента вклучувајќи инфраструктурни бариери и успорувачи на брзини“.

Вакви барања преку отворено писмо испратија од Граѓанската иницијатива „Шанса за Центар“, испратено до претседателот на Владата, Димитар Ковачевски, Собранието и градоначалничката на Град Скопје, а по вчерашната сообраќајна незгода во која животот го загуби 24-годишна девојка од Радовиш.

„Бараме неодложно да се преземе одговорност и да се покаже политичка волја за што побрзо воспоставување на сообраќајна безбедност на патиштата низ државата, а особено на градските улици во Скопје. Активирањето на автоматскиот систем со камери ќе ја олесни работата на полицијата, ќе ја зголеми сообраќајната дисциплина и култура, а со тоа ќе се зголеми и безбедноста на сите учесници во сообраќајот. Со ова ќе се растеретии судскиот систем од администрирање на сообраќајни прекршоци кои во голем дел остануваат без епилог или казни кои не се спроведени“, се вели во дописот од „Шанса за Центар“.

Од Иницијативата апелираат оти во духот на борбата против корупција и транспарентното управување, ова да биде врвен приоритет во државата и бараат активирање на автоматскиот систем за следење и казнување, со кој граѓаните ќе се чувствуваат правично дури и кога ќе бидат казнети, бидејќи ќе знаат дека системот не распознава моќ, врски и познанства.